Bu şəhərdə biri vardı
Əli Allah ətəyində.
Ətri vardı bu şəhərin
Çəmənində, çiçəyində.

Allahından insanlara,
İnsanlardan Allahına
Xeyir-dua gətirərdi,
Yer əhlinin göy əhlinə,
Göy əhlinin yer əhlinə
Salamını yetirərdi.

Bu şəhərdə biri vardı
Dili dua, gözü yaşlı.
Ahıl-cahıl sevimlisi,
Ruhu cavan, özü yaşlı.

Balasına soyuq dəyən,
Babasının beli sərpən
Qapısında dayanardı.
Duaları ünvanına,
Sahibinə çatan kimi
Gələnlərdən yayınardı.

Bu şəhərdə biri vardı
Getdi, şəhər geydi qara.
Əzadarlar sıralandı
Hər gün keçdiyi yollara.

Matəmini səmalarda,
Simalarda görə-görə,
Gedişinə inanan yox.
Yuxu imiş o bir nəfər,
Gecənin günəş yuxusu -
Getdi, hələ oyanan yox.